Mit eine vastelaovend, in oos vruigere Carna bie Guus, heel get jaorkes trök, besjlöät -gans sjpontaan- ein gruupke vastelaoves-vierders ein Zaate Hermenie te sjtarte!.
Mekkelik gezag, mer wie gaon veer dat noe doon?

Mit väöl hulp van boete-aaf, wo veer nog altied heel get luuj zeer dankbaar veur zeen, höbbe veer kènne beginne mit “de eesjte repetiesj”, o.l.v. Jos, noe al weijer 20 jaor geleeje !
Eesj note lere ! Note aangeweze door Jos op eine notenbalk, geteikend op ein sjoolbordje in ós meziekcenter “Freestyle”! En toen koosj ’t blaoze beginne.
Wat waore veer bliej mit oos eesjte gesjpeelde note en trómmelsjlaeg!

Op zunjig 24 fibberwarie 2002 woort in Carna de oprichtingsvergadering gehawte !

Greutsj zeen veer dr’op dat veer ós jedere vastelaovend en op väöl festiviteite in en boete ós dörp muzikaal höbbe laote heure. Al die jaore koosjte veer geneite van same meziek make en “hel en valsj” blaoze !!

Op zaoterdig 2 juli 2022 woort ós 20 jaorig besjtaons-jubileum feestelik gevierd; dao ginge veer, same, mit 30 man sjterk, in de rooj bloes en mit instrument, mit de bös nao zonnig Valkenburg.

Nao de óntvangs mit koffie en vlaai, woort door veurzitter Diana eesj sjtil gestjange bie Jan, Harrie en Jos, die noe neit meer in ós midde kènne zeen.

Dan Jos Lipsch, ózze dirigent, woort flink in ’t zunneke gezat en bedank veur zien al 20 jaor langk boetegeweun groot gedöldj mit ós muzikante !

Auch de 11 muzikante, die al vanaaf ‘t begin lid zeen, woorte in ’t zunneke gezat en woorte geëerd mit ein herinnerings-sjpeldje.

En veur de 4 nuuj muzikante, welke nao de zomervakansie gaon mitblaoze, waor ein flesj Flügel, dit óm hun drempelvrees te euverwìnne!.

Daonao ginge veer blaoze in de bínnesjtad; dat woort vrolik en enthoesiast óntvange door al die toeriste op de terrasjes!
“Sjpeel hiej nog get, blaoze, blaoze etc.”
Zelfs handjteikeninge woorte gevraog en d’r woort gedans op ooze meziek! Gezellig!

En wat waor die City-Toer geweldig: mit z’n allen en mit väöl meziek en hellll sjlaagwerk in ’t treintje door Valkenburg.
Wat ein beleavenis !

Ein heel gesjlaag feeske woort in Valkenburg aafgesjlaote mit ein heerlik dineetje veur ós alle!

‘t Waor eine super sjoone daag !
Eine daag óm nooit te vergaete !